Archive for November, 2008

Soos meeste Suidlanders bewus is, is dit onwettig om met ‘n radio van meer as ‘n paar honderd milliWatt te praat sonder ‘n toepaslike lisensie. Die goedkoop tweerigting radios wat by buitelewe winkels beskikbaar is (bv. Zartek, Oregon Scientific, en Motorola radios) se kraguitset is laag genoeg dat hulle nie lisensiëring benodig nie. Die reikafstand van hierdie radiotjies laat egter veel te wense oor.

Meer kragtige hand- of voertuigradios benodig ‘n lisensie. ‘n Alternatief vir iemand wat graag ‘n radiostel wil bedryf, is om die Radio Amateur Eksamen af te lê.

In Suid-Afrika is daar tans drie klasse van amateurlisensie, die Klas A1, A2, en Klas B lisensies. Die roepseine vir die onderskeidelike lisensies is ZS, ZR en ZU. Die laaste klas, Klas B, is spesifiek onlangs ingebring om dit makliker te maak om die stokperdjie te betree, en baie skoolkinders en radio-amateurs se vroue/meisies lê die Klas B lisensie af om ook die stokperdjie te kan beoefen. Onlangs is ‘n 9-jarige meisie onder klas B gelisensieer! Oor die afgelope jaar het ten minste 5 Suidlanders hulle amateur lisensies bekom, en daar is verskeie Suidlanders wat reeds etlike jare radio-amateurs is.

Daar is sekere beperkings op Klas B lisensiehouers, in terme van die kraguitset van die radios wat hulle mag gebruik (20W teenoor 100W vir klas A2 en 400W vir Klas A1), asook op die frekwensies waarop hulle mag praat (minder toegelate frekwensies as die ander twee klasse).

Indien u dus ‘n radio wil aanskaf (om bv. tussen voertuig en huis te kan praat), oorweeg dit om saam met u man/vrou die ZU (Klas B) lisensie af te lê – dis ‘n stokperdjie wat definitief oorlewingswaarde het!

Verdere inligting is beskikbaar by die webwerf van die Suid-Afrikaanse RadioLiga, die liggaam wat Radio Amateurs in Suid-Afrika verteenwoordig. Hierdie direkte skakel kan gevolg word om meer oor die Amateur Eksamen uit te vind.

Ons het ‘n bydrae ontvang van leser HeinG, wat daarop wys dat die lys wat onlangs gepubliseer is (rugsakinhoud) ‘n kompas en watersuiweringstablette kort.

Enigiemand wat die nuus lees, sal saamstem dat ons watervoorraad in Suid-Afrika al swakker raak.  Watersuiweringstablette is dus ‘n BAIE goeie idee.  Die Chlor-Floc handelsnaam is baie bekend as ‘n goeie produk.  Dieselfde maatskappy maak ook ‘n produk WaterMaker, wat in ‘n poeiervorm verkoop word, en wat gebruik word om groter volumes te suiwer.  Volg die instruksies op die verpakking.

‘n Kompas is ‘n debatteerbare item.  Dis nooit ‘n slegte idee om ‘n goeie klein kompas in ‘n rugsak te he nie, en ‘n kompas kan mens help voorkom om in sirkels in die bos rond te loop.  Maar baie min mense beplan om baie kilometers deur vreemde bosse te stap nie…

Ideaal moet mens ‘n kompas, ‘n goeie kaart (of stel kaarte) hê, en moet mens weet hoe om dit te gebruik.  Dit hang nie soos ‘n GPS ontvanger af van krag om te werk nie.  Maar om ‘n volledige stel kaarte rond te piekel is ook nie altyd prakties nie.  En dit gaan ook nie help as mens in ‘n krisis eers moet leer navigeer op kompas en kaart nie.  Die gebruiker moet goed bekend wees met die verskil tussen ware noord, magnetiese noord, kaart interpretasie en -skaal, en die gebruik van die toerusting.

As ‘n opvolg op ‘n vorige pos, het ons die volgende brief van Gustav Muller ontvang (ons plaas dit verbatim):

Volgens `n hele paar politieke ontleders (selfs die liberales) die laaste tyd is politieke geweld glad nie meer so `n onmoontlikheid nie. In sommige uitlatings, onafwendbaar! Iets wat ons al `n geruime tyd vir ons volk en Suid-Afrika voorspel. Waarvoor ons onmeetbare kritiek ontvang het en in sommige gevalle veral in die verre verlede uitgelag is. Die stelselmatige opbou na ‘die’ moontlikheid (politieke geweld) het al plus minus vier jaar gelede met die eerste groot stakings (wat in dvd 1 bespreek word) in aanvang geneem. Op die huidige oomblik is baie mense voorbereid in terme van kosvoorraad, brandstof, tente, medies ensovoorts. Die vraag waarop ons egter nie een `n antwoord het nie, is hoe vinnig u moontlik u blyplek sal moet verlaat indien nodig? Ons het dit met Witbank ondervind dat paaie versper was, ons patrollies moes ry om enige invloei van ongewensdes te monitor. Gestel die oproep het daardie nag gekom dat al ons mense binne 20 min in die dorp by `n spesifieke punt moes aanmeld, en vandaar het hul Witbank verlaat om nie gou weer terug te keer nie. Wat sou u binne 5minute kon laai in so situasie? Ek stel voor dat elke gesin `n grypsak pak vir elke lid van die gesin. Die sakke op `n spesifieke plek in die huis te plaas sodat elke gesinslid weet waar dit is en oefen dit in! Dat u binne 5 minute in die motor(wat se brandstof bo driekwart behoort te wees) kan wees en ry. So `n sak kan uit die volgende bestaan:

• 2 Man tent (Checkers) +- R149.00 – Bo op rugsak vas gegespe.
• 1 Slaapsak +- R200.00 – Onder rugsak vas gegespe.
• 1 Stel goeie stapskoene
• 2 Stelle kortbroeke
• 2 Stelle langbroeke
• 2 Kort hemde
• 2 Lang hemde
• 4 Pare kouse
• Warm baadjie
• Onderklere
• Belt
• 1 blikkie Zam-Buk salf
• 2 Blokkies Viva of Sunlight seep vir klere was
• 1 Blokkie lyfseep
• 1 Buisie tandepasta en tandeborsel
• Waterbottel
• Eetstel
• Knipmes
• 2 Bic lighters
• 3 Volle gebalanseede voedsel vervanger (3kg). Dit kan `n volwassene vir 30 dae voed (100g per dag met koue water) – Skakel Riaan Roux by tel nr. 076 350 6221 vir nadere besonderhede.

Met bogenoemde het u kos, klere,slaapgoed en ‘behuising’ vir 30 dae!

Ek sal binnekort `n verdere skrywe rig wat sal opvolg op hierdie.

NS. Let wel, hierdie is slegs advies en moet nie gesien word dat ek paniek probeer saai nie. Bly kalm, bly sterk en bowen alles, bly gefokus op die Almagtige, want net Hy gaan ons deur alles lei en anderkant uitbring.

Hiermee doen ek Gustav Muller `n beroep op elke volksgenoot om elke aand om 20:00 in gebed te tree vir ons volk, ons bestuur (om alles wat ons doen en beplan binne die GROOT PLAN van ons Hemelse Vader te doen) vir Sy Leiding, en bid ook vir u persoonlike. Hierdie instelling, TOTDAT ons weer vry gemaak is deur die ALLERHOOGSTE !!!

Dankie

Gustav

Knegte van die Allerhoogste teen die hele wêreld vry.

Hier is die skakel na die Al Jazeera video van die ANC Jeugliga leiers se uitsprake (waarna ons gister verwys het):

Video van ANC Jeugliga uitprake

Het julle al gedink wat julle sal doen as julle slegs 15 minute het om jou huis te verlaat? Hoeveel van jou voorbereidings kan jy binne 15 minute afhandel, in jou kar klim, en jou huis verlaat?

Wat as die 15 minute ‘n 3 ure waarskuwing periode is? Sal jy beter kan doen? En wat as jy heeldag het om op te pak? Is jou onttrekkingsplanne gebaseer rondom ‘n waarskuwingsperiode van 8 ure of langer?

Hierdie is nie sommer net vrae nie. Mens moet mooi gaan sit en prioritiseer, en jou verpakking van jou voorraad en toerusting so doen dat jy dit vinnig kan laai. Vir die 15 minute onttrekking scenario moet alles regstaan, jy kan nie bekostig om iets nog te moet gaan terugkry van die buurman af nie. Toerusting wat in gereelde gebruik by jou huis is, gaan moontlik moet agterbly.  Jou 15 minute lysie gaan noodwendig korter wees as die ander twee.  Maak seker dat daar niks krities op die 15 minute lys kort nie.

Is jou gesin een van daardie wat moeilik is om binne 15 minute bymekaar te kry net om te gaan fliek? Dan is hierdie pos waarskynlik meer van toepassing op jou!

“People like Terror Lekota and all those people who want to destroy the history of the organisation (ANC), they behave like cockroaches and they must be destroyed“ – Jason Mkhwane, ANC Jeugliga leier, Sedibeng

“We must kill them.” – Themba Ndaba, sekretaris, ANC Jeugliga, Sedibeng, in antwoord op ‘n vraag wat bedoel word met “they must be destroyed”.

Bron:  Berig in “The Star”

Dit is baie maklik om in die slaggat te trap van “ons moet die nuutste item van die 4×4/buitelewe winkel hê, anders kan ons nie oor die weg kom nie”.  Ons het dit al voorheen gesê, ons sê dit weer, en ons gaan dit waarskynlik in die toekoms WEER sê:  “Skills beat technology, every time”.  Dis belangriker om jou kop te gebruik as wat dit is om die regte toerusting te hê (natuurlik is die regte toerusting met die nodige kennis NOG beter!).

Om die bostaande punt te illustreer, konsentreer ons in hierdie artikel op die voorbeeld van energiebronne wanneer Eskom se produk nie beskikbaar is nie:  die algemene oplossing(s) is batterye en sonpanele, of ‘n generator (petrol of diesel).  Eersgenoemde is DUUR, en laasgenoemde rasering en afhanklik van ‘n voorraad brandstof.  Daar is egter alternatiewe as jy bietjie lateraal dink en handig met jou hande is.

In die fliek “Soylent Green” speel Charlton Heston die rol van ‘n speurder in die nie-te-verre-toekoms, en is die goed waaraan ons gewoond is (soos elektrisiteit, seep, vleis, ens.) maar skaars.  In een toneel in die fliek begin hulle (elektriese) lig skielik verflou, en spring een van die karakters wat ‘n woonstel deel op ‘n fiets wat aan ‘n generator gekoppel is wat hulle batterye herlaai.

Hierdie konsep is natuurlik totaal werkbaar, Google self vir “alternator bicycle alternative energy” en lees van die artikels wat die soektog oplewer.  ‘n Gewone persoon (nie ‘n atleet nie) kan blykbaar sowat 80W (meganiese) energie op ‘n fiets opwek, wat so rondom 60W elektriese energie lewer (selfde as ‘n R3000 sonpaneel).  En hierdie stelsel kan vir baie goedkoop uit ‘n ou fiets en ‘n ou alternator gebou word – daar is selfs mense wat die fietspedale aan ‘n stoel vassweis sodat jy kan sit en trap.

Die alternator moet vinnig loop om goed te werk, en die oplossing is dat ‘n lang waaierband rondom die velling (sonder band) en om die alternator loop, wat ‘n goeie ratverhouding lewer.  Die nadeel is dat die fiets haas onmoontlik is om te trap indien die battery baie pap is, en 15 minute op die generator is ‘n goeie sessie (die hele gesin sal moet help trap).

Die bostaande voorbeeld illustreer dat daar alternatiewe vir baie probleme in wat die Amerikaners ‘n “grid-down” scenario is – jy moet net jou verbeelding gebruik en bietjie handig wees.

Wanneer die Amerikaanse regering meer geld in ‘n jaar spandeer as wat hulle inkry (uit bv. belasting ens.), word dit “deficit spending” genoem. In jare wat hul begroting “uitwerk” en hulle minder spandeer, noem mens dit ‘n “budget surplus“. Bostaande geld vir enige regering, nie net die Amerikaners nie.

Wanneer die laaste 200 jaar (of so) se “deficits” (tekorte) bymekaar getel word, en die “surpluses” se totaal afgetrek word, kom mens uit by die “national debt” – die geld wat die Amerikaanse regering skuld (aan bv. ander lande).

Op 7 Oktober is daar in Amerika berig dat die tekort ‘n rekord $493 biljoen is vir die jaar (wat toe pas afgesluit is). Die vorige jaar se tekort was maar $163 biljoen (volgens hierdie berig in die USA Today). Die vorige rekord was $413 biljoen in 2004.

Volgens die US National Debt Clock webwerf (wat rekord hou, uit regeringsbronne, van die totale Amerikaanse regeringskuld), is die VSA (vandag) $10,663 triljoen dollar in die rooi. Die Bush administrasie se bydrae tot hierdie syfer is blykbaar $4 triljoen!

Die webwerf maak die stelling dat die Amerikaanse skuld sedert einde September 2007 teen ongeveer $4 biljoen per dag groei. Maar so 6 weke gelede (7 Oktober) was dit in die nuus dat die “Debt Clock” in New York se strate uit syfers geraak het (dis toe die skuld syfer groter as $10 triljoen geraak het). Dit beteken dat die skuld in die laaste 45 dae met sowat $660 biljoen gegroei het – sowat $15 biljoen dollar per dag!

Onthou dat die Amerikaanse regering NIE die geld wat hulle nou so lekker uitdeel om die finansiële krisis “op te los” nie – dit word gefundeer uit verdere skuld (sleg) of die druk/skep van NUWE geld (ook sleg, vir inflasie). Volgens baie ekonomiese kommentators is die OORSAAK van die finansiële krisis presies dit wat die VSA regering nou WEER doen.

Hierdie berig een week gelede op CNBC beweer dat die totale koste van die ingryping in die mark om die finansiële krisis te ontlont, die VSA nou al ongeveer $4,3 TRILJOEN dollar is – en die regering weier om sekere bedrae bekend te maak. Net vandag berig CNN dat Citigroup met $300 biljoen gehelp gaan word (en ‘n verdere $20 biljoen in kontant).

Ten spyte van die verskillende regering(s) se versekerings dat die wêreld NIE in ‘n depressie is nie (moontlik ‘n ligte resessie), is ons van opinie dat die moeilikheid nog VER van verby is. Die STELSEL is die probleem, die krisis is net ‘n simptoom. En die simptome kom al dekades met ons, dit is net geïgnoreer.

In hierdie lig is dit interessant dat Barack Obama (of een van sy helpers) ‘n stelling maak dat hy (Obama) “sal doen wat nodig is” om die krisis af te weer/op te los. Is hulle ernstig, of is dit net politiek wat gespeel word? Want dan gaan hy die HELE finansiële stelsel waarop Amerika al dekades funksioneer, tot niet moet maak (baie pynvol). Waarskynlik gaan hy net meer geld (of liewer, “geld”) na die probleem se kant toe gooi (soos hierdie berig in News24 aandui), en verder bydra tot die probleem. Terloops, wat beteken “massive spending” in elk geval? Massief gemeet aan dit wat reeds gespandeer is?

Nog ‘n stukkie triviale inligting: die 2007 finansiële jaar (die jaar waarin die tekort $162 biljoen was) se inkomste was $2730 biljoen – oftewel $7.5 biljoen per dag. So die skuld groei nou (tans twee maal) vinniger as wat die Amerikaanse regering geld kan invorder – as jy dit met jou persoonlike bankrekening probeer word jy bankrot verklaar.

Maar dis natuurlik net ons (leke-) opinie, en finansiële adviseurs sal van ons verskil…

[Stel julle eer daarin] om rustig te lewe en julle eie sake te behartig en met julle eie hande te werk, soos ons julle beveel het, sodat julle welvoeglik kan wandel teenoor die wat buite is, en aan niks behoefte mag hê nie.

1 Th 4:11-12

Leser KH het die volgende vraag en opmerkings:

Wat van vierwiel of motorfietse? As mens dit het sal dit goed wees om dit saam te neem die dag as jy onttrek, mits jy natuurlik brandstof vir dit het. Dit kan help om miskien verkenning te doen, water aan te ry ens… Dis aansienlik ligter op brandstof as voertuie…

Ons stem saam. Dit sal handig wees om ‘n motorfiets te he vir nog ‘n paar redes. Wanneer onttrek word en die groep uitbeweeg na ‘n VAP, dan kan die persoon op die fiets vinnig tot by die verteenwoordiger om te hoor waarheen om te gaan, en kan dan terug na sy groep om vir hulle aanwysings te gee. Dit kan ‘n moontlike opeenhoping naby die VAP verhoed.

Ek verstaan nie hoekom julle al die parte wil saam karring nie – as jy ‘n ou voertuig het maak dit seker sin. Maar vir ‘n nuwe en betroubare voertuig maak dit glad nie sin nie. Veronderstel jy het 1000l brandstof gaan jy op die uiterste 15000km ry meeste voertuie se diens intervalle is 15000km en as jy dit met 5000 of selfs 10000km oorskry gaan daar nie veel met die voertuig verkeerd gaan nie?

Goeie vraag. Eerstens, neem gerus ‘n lug-filter, veral as jy baie stofpad gaan ry. Op ‘n stofpad word hy vinnig vuil en onbruikbaar. Selfs so min as 5000km is soms te veel.

Verder, wat van mense wat skielik moet onttrek ‘n week voor die voertuig moes gaan vir sy diens? Dan het jy nie 15000km buffer tot die volgende diens nie. Die parte is ook nie net vir terwyl ons onttrek nie, dis ook vir na die tyd. Ons weet GLAD nie waarheen ons terugkom nie. As jy wil sukkel om parte te kry vir ‘n diens sodra ons terugkeer na die beskawing (wat daarvan oor is), los dan die parte.

Onthou, ons praat net van ‘n paar van die belangrikes, nie elke moontlike part nie. Moet asb. nie probeer om ‘n spaar ratkas of enjin saam te neem nie! Dit behoort nie veel geld of spasie op te neem nie, maar kan jou iewers langs die pad net BAIE help.